مويىنقۇم اۋدانى وبلىس ورتالىعىنان ءۇش ءجۇز شاقىرىمنان استام قاشىقتىقتا ورنالاسقان. سونىمەن قاتار, مۇندا ناۋبايحانا سانى دا از. بۇل ماسەلەگە جاۋاپتى شەندىلەر نان باعاسىنىڭ ون تەڭگەگە دەيىن قىمباتتاۋىن وسىنداي ماسەلەلەرمەن بايلانىستىرىپ وتىر. ءتىپتى, وتكەن جىلى كۇزدە ناۋبايشىلار بيداي مەن ۇننىڭ باعاسىنىڭ دا وسكەندىگىن ەسكەرە وتىرىپ, اس اتاسىن قىمباتتاتۋ ءۇشىن اۋدان اكىمىنە حات تا جازعان ەكەن. ناتيجەسىندە جامبىل وبلىستىق تۇراقتاندىرۋ قورىنان 500 توننادان اسا ۇننىڭ كەلىسى ارزانداتىلعان 70 تەڭگەدەن نان شىعارۋشى نىساندارعا بەرىلىپ وتىرعان. ەندى اعىمداعى جىلى قاڭتار ايىنىڭ سوڭىندا قورداعى ۇن دا تاۋسىلعان. سوندىقتان دا نان باعاسىن بىرقالىپتى ۇستاپ تۇرۋ مۇمكىن بولماي وتىرعان كورىنەدى.
جامبىل وبلىستىق اۋىل شارۋاشىلىعى باسقارماسىنىڭ باسشىسى بەرىك نىعماشەۆتىڭ ايتۋىنشا, ناۋبايحانا يەلەرى باعانى بىردەن 10 تەڭگەگە كوتەرۋدى سۇراپتى. الايدا, وبلىس اكىمى اسقار مىرزاحمەتوۆ نان باعاسىن تەك 5 تەڭگەگە عانا كوتەرۋگە رۇقسات بەرگەن. «بۇگىننەن باستاپ نان باعاسى بەس تەڭگەگە كوتەرىلدى. قازىرگى كۇنى نارىقتىق باعادا ەلىمىزدىڭ سولتۇستىك وڭىرلەرىندە بيداي 75-80 تەڭگەدەن بولىپ وتىر. جامبىل وبلىسى بيدايدىڭ 70 پايىزدان استام كولەمىن سول سولتۇستىك وڭىرلەردەن اكەلەدى. بىراق, ول كەزدە ۇننىڭ باعاسى 70-80 تەڭگە بولاتىن بولسا, بۇگىنگى تاڭدا ۇننىڭ باعاسى 90 تەڭگەگە جەتىپ قالدى», دەيدى باسقارما باسشىسى.
وتكەن جىلدىڭ قاراشا ايىندا قارجىلاي قيىندىققا شىداي الماعان ناۋبايشىلار نان باعاسىن نەگىزسىز 10 تەڭگەگە كوتەرگەن بولاتىن. بارلىق كاسىپكەردىڭ كاسىبىنەن پايدا تاپقىسى كەلەتىنى راس, ارينە. ءونىمدى حالىققا جەتكىزۋ ءۇشىن كەتەتىن شىعىن تاعى بار. دەي تۇرعانمەن, قىمباتتاۋعا بايلانىستى حالىقتىڭ قارسىلىعىنىڭ ناتيجەسىندە عانا اس اتاسىنىڭ باعاسى باستاپقى قالپىنا كەلگەن ەدى.
بۇگىنگى تاڭدا تاراز قالاسىندا ەلدى نانمەن قامتىپ وتىرعان 8 ناۋبايحانا بار. ناۋبايشىلار 400 مىڭعا جۋىق تۇرعىنى بار تارازدىقتار ءۇشىن تاۋلىگىنە 90 مىڭ بولكە نان پىسىرەدى. بۇل رەتتە كۇن سايىن 50-55 توننا ۇن جۇمسالادى ەكەن. ايتا كەتەيىك, جامبىل وڭىرىندە نان باعاسى جەرگىلىكتى بيلىكتىڭ كەلىسىمىمەن وسىدان ەكى جىل بۇرىن 55 تەڭگەدەن 65 تەڭگەگە كوتەرىلگەن بولاتىن. ەندى بۇگىن بەس تەڭگەگە تاعى دا قىمباتتاپ وتىر.
حاميت ەسامان,
«Egemen Qazaqstan»
جامبىل وبلىسى
